صراحتي

ماجيت ارجع شي ابد جيتك وعندي كلمتين هذي ترى صراحتي
لو توجعك صراحتي

ما جاك جا من طيب خاطر بس باخذ حاجتين
اباخذ الباقي من شعوري واباخذ راحتي

الى متى وانا اتسامح واخفي الوجه الحزين
والى متى عوجاك تتمرد على سماحتي

وضحتلك والظاهر انك ما تحب الواضحين
حتى ان شوقك قام يستعجم على فصاحتي

دلة وصالك يوم جيت تصبهالي باليمين
قبضت قلبي دونها من قبل لا اقبض راحتي

عطيتك الجنة لجل تهنا بجنة عاشقين
وتركت كل اطيابها واكلت من تفاحتي

لا تجيب طاري للوفا ولا تلوح بالحنين
ما لك بها هذي شعاراتي وهذي ساحتي

وان قلت وين الطيبين اقول باقي طيبين
من وين ما امتد الضيا تكبر معه مساحتي

تكشف لك الايام لا كثروا عليك العابرين
وكني اشوفك تقطع الرمضا وتنشد واحتي

انا رسمتك حلم يزهى لوحتي طول السنين
مثل ما هذي ريشتي هذي بعد مساحتي